मनोरञ्जन

भदौ महिनामा १८ फिल्मले चलचित्र विकास बोर्डबाट निर्माण इजाजत पाएका छन् । सूचीमा नवीन सुब्बादेखि पाका निर्देशक उज्वल घिमिरेसम्म छन् । सूचीमा केही नयाँ निर्माता छन् भने कतिपयले सिक्वेल निर्माणको लागि अनुमति पाएका छन् । दिनेश राउत निर्देशित फिल्म ‘कुमारी’ले निर्माण इजाजत लिएको छ । यो फिल्मको छायांकन अहिले चलिरहेको छ । गीतकार समेत रहेका शंकर अघिकारी ‘घायल’ले फिल्म ‘सुस्केरा’ निर्देशन गर्ने भएका छन् । यो फिल्मले पनि अनुमति पाएको छ ।  

जेनजी आन्दोलनले रोकिएका फिल्मको छायांकन धमाधम सुचारु हुन थालेको छ । हल खुलिसकेका छन् भने फिल्म छायांकन थलोतर्फ प्रस्थान गर्न थालिसकेका छन् । रेखा थापाको फिल्म ‘३६ को आँकडा’को रोकिएको छायांकन सुचारु भएको छ । दशैंअघि छायांकन सक्ने गरि सुटिङ भैरहेको रेखाले जानकारी दिइन् । दिनेश राउतले निर्देशन गर्ने फिल्म ‘कुमारी’को छायांकन सुरु भएको ६ दिन हुँदा अचानक जेनजी आन्दोलन चर्कियो । रोकिएको छायांकन सोमबारदेखि पुनः तनहुँमा सुरु हुने तयारीमा छ । क्याप्टेन साब, गोबर गणेश, काजी लगायतका फिल्मको रोकिएको छायांकन पनि धमाधम सुरु हुन थालेको छ । ‘परालको आगो’ले पनि रोकिएको छायांकन सुरु भएको निर्माताले जनाएका छन् ।

‘हरिबहादुरको जुत्ता’लाई अमेरिकामा रिलिज गर्दै आहान पौडेलले फिल्म वितरणमा डेब्यू गर्ने भएका छन् । उनी चर्चित नेपाली फिल्म वितरक उज्वल पौडेलका छोरा हुन् । पछिल्लो समय टेक्सासमा बसोबास गर्दै आएका उनले हरिवंश आचार्य स्टारर फिल्मलाई त्यहाँको बक्सअफिसमा रिलिज गर्न लागेको प्रेषित विज्ञप्तिमा जनाइएको छ ।उनको वितरण कम्पनी चलचित्र इन्टरटेनमेन्ट एलएलसीले अमेरिकाका ८० पर्दामा फिल्म रिलिज गर्न लागेको जनाइएको छ । टेक्सास, न्यूयोर्क, ओहायो, पेन्सिलभेनिया, कनेक्टिकट, न्यू ह्याम्सायर, मासाचुसेट्स, नेब्रास्का, जर्जिया, मिजौरी, विसकन्सिन, नर्थ डेकोटा, मिनेसोटा, आयोवा, मेरिल्याण्ड, वासिङ्टन डीसी, भर्जिनिया, उटाह लगायतका सहर र राज्यमा फिल्म लाग्नेछ ।