पोखरा । चलचित्र ‘लाज शरणम्’मा महत्त्वपूर्ण भूमिका निभाएका डोल्पाका विकास केसीको कुपोषणका कारण मृत्यु भएको छ । केसीको मङ्गलबार निधन भएको हो । चलचित्रको कथामा कुपोषित बालकको पात्रका रूपमा चित्रण गरिएका केसी वास्तविक जीवनमै पनि कुपोषणबाट ग्रसित थिए ।
चलचित्रको सुटिङपछि निर्माण टिमले उनलाई उपचारका लागि काठमाडौं ल्याएको थियो । शुरूमा ग्रीनसिटी अस्पताल लगिएका उनलाई त्यहाँबाट कान्ति बाल अस्पताल रेफर गरिएको थियो । कान्ति बाल अस्पतालले जटिल खालको कुपोषणको उपचार सम्भव नभएको जनाउँदै उनलाई फिर्ता पठाइदिएको सोही चलचित्रमा केसीको बाबाको भूमिका देखिएका महेश त्रिपाठीले फेसबुकमा उल्लेख गरेका छन् ।फिल्म ‘लाज शरणम्’ कलाकार महेश त्रिपाठी र रेणु योगीको कुपोषित बालकको भूमिकामा केसीले अभिनय गरेका छन् ।
उनको निधनको खबर लाज शरणम् टिमले सामाजिक संजालबाट सेयर गरिरहेका छन् । ‘बाल मृत्यु सरकारका लागि गम्भीर चुनौती हो । यसमा पनि पोषिलो खानेकुरा र सुक्ष्म पोषक तत्वको अभावबाट हुने कुपोषणबाट बालबालिकाहरुले मृत्युवरण गर्नु पर्ने अवस्था नेपालमा मानव विकासमा आजको चित्र हो । यसप्रकारको खवर कहिल्यै कसैले लेख्न नपरोस् । कसैलाई सुनाउनु नपरोस् । यस घटनाप्रति सरकारसहित सम्बद्ध पक्षको ध्यानाकर्षण हुन सकोस् भन्ने अपेक्षा गर्दछौँ । कर्णालीको विद्यमान दुःखलाई चलचित्रको पर्दामा उतार्न अन्तरमनबाट सहयोग गर्नुहुने कर्णालीबासी, विकास के। सी। बसोबास गर्नुहुने। गाउँका सम्पूर्ण दाजुभाइ दिदीबहिनी तथा विकासको परिवारप्रति हामी नतमस्तक छौँ । रहिरहनेछौँ । यहाको आर्थिक, सामाजिक अवस्था सुधार गर्न कलाका माध्यमबाट आवाज उठाइरहनेछौँ,’ सामाजिक सञ्जालमा उल्लेख गरेका छन् ।
लाज शरणम टिमले नेपालबाट कुपोषण हटाउन कला क्षेत्रबाट पूरा गर्नुपर्ने दायित्व सदैव निर्वाह बताएका छन् । जेपीटी क्रिएसनले निर्माण गरेको फिल्म ‘लाज शरणम्’ अहिले छैटौं हप्तामा हलमा प्रदर्शन भैरहेको छ ।
