पोखरा, – नेपाली सवारीसाधन बजारमा स्थापित ब्रान्ड टिभिएसले आफ्नो नयाँ मोडेल जुपिटर ११० को भव्य सार्वजनिक अनावरण पोखरामा सम्पन्न गरेको छ। जगदम्बा मोटर्स नेपालमार्फत नेपाली बजारमा भित्रिएको यो स्कुटरले नेपाली सडक अवस्था, उपभोक्ताको आवश्यकता र प्रविधिको समायोजनलाई मध्यनजर गर्दै तयार पारिएको बताइएको छ।
अनावरण समारोहमा कम्पनीले स्कुटरको डिजाइन, प्रविधि, सुरक्षा, कार्यसम्पादन र मूल्य निर्धारण लगायतका विषयमा विस्तृत जानकारी सार्वजनिक गरेको थियो।
नयाँ जुपिटर ११० मा दुईवटा हेलमेट अटाउने ३३ लिटर क्षमताको सिटमुनी भण्डारण, बाहिरी इन्धन ट्यांकीको ढकनी, तथा मजबुत फलामको बडी संरचना जस्ता सुविधा समावेश छन्। दैनिक प्रयोगमा सहज हुने यस्ता विशेषताले स्कुटरलाई लामो दूरीको यात्रा र सहरभित्रको चापयुक्त ट्राफिक दुबैका लागि उपयुक्त बनाएको छ।
यस स्कुटरमा ‘खोज्न सजिलो’ र ‘पछ्याउने बत्ती’ जस्ता प्रयोगकर्ता मैत्री सुविधा समावेश छन्। यस्तै, डिजिटल सूचना पाटीमार्फत इन्धन खपत, बाँकी दूरी, औसत खपतजस्ता जानकारी थाहा पाउन सकिन्छ।
आकर्षक रेखांकन, लामो सिट, फराकिलो खुट्टा राख्ने स्थान, मोबाइल चार्ज गर्ने सुविधा, झोला राख्ने स्थान, सजिलै ठाडो पार्न मिल्ने खुट्टा स्ट्यान्ड जस्ता विशेषताले यात्रालाई अझ सहज र सुविधाजनक बनाउने कम्पनीको दाबी छ। यसका साथै, टेलिस्कोपिक झट्का रोक्ने प्रणाली र ठूला पाङ्ग्रा प्रयोग गरिएको छ, जसले असजिलो सडकमा समेत सहज यात्रा सुनिश्चित गर्छ।
सुरक्षाका दृष्टिले स्कुटरमा सन्तुलित ब्रेक प्रणाली, संकेत आफैँ बन्द हुने प्रणाली, तथा आकस्मिक ब्रेक दिँदा पछाडि सवारीसाधनलाई संकेत दिने व्यवस्था जडान गरिएको छ। यस्तै, गाडीको सन्तुलन कायम राख्न सहयोग गर्ने प्रविधि समेत समावेश गरिएको छ।
इन्जिन तर्फ हेर्दा स्कुटरमा एक सय तेह्र दशमलव तीन घन सेन्टिमिटर क्षमता भएको चार स्ट्रोक इन्जिन जडान गरिएको छ, जसले छ हजार नौ सय घुमाईमा पाँच दशमलव नौ किलोवाट शक्ति र पाँच हजार घुमाईमा नौ दशमलव दुई न्युटन मिटर घुमाउने बल उत्पादन गर्छ।
स्कुटरमा प्रयोग गरिएको स्वचालित सहायता प्रविधि र एकीकृत सुरूवात प्रणाली को सहयोगले माइलेजमा १५ प्रतिशतसम्म सुधार ल्याउने तथा सवारी नचलाउँदा इन्जिन आफैँ बन्द भएर इन्धन बचत हुने जनाइएको छ।
कम्पनीका अनुसार, टिभिएस जुपिटर ११० विशेषगरी नेपाली भूगोल, सडक अवस्था र प्रयोगकर्ताको व्यवहार अनुसार डिजाइन गरिएको स्कुटर हो। हाल यो स्कुटर ‘डन निलो’ रंगमा उपलब्ध रहेको छ भने, यसको सुरुवाती मूल्य दुई लाख सन्ताउन्न हजार नौ सय रुपैयाँ तोकिएको छ।
नेपालभर रहेका टिभिएसका अधिकृत बिक्री केन्द्रहरूमा यो स्कुटर उपलब्ध रहेको र छोटो समयमै अन्य रंग विकल्पहरू पनि बजारमा ल्याइने जानकारी दिइएको छ। सवारीसाधनको विक्रेताको रूपमा जगदम्बा मोटर्स नेपाल ले गुणस्तरीय सेवा, सहज बिक्री प्रक्रिया, सर्भिसिङ र ग्राहक सन्तुष्टिमा केन्द्रित सेवा प्रदान गर्दै आएको उल्लेख गरिएको छ। कम्पनीले यो नयाँ मोडेलबाट ग्राहकको विश्वास अझै मजबुत हुने विश्वास व्यक्त गरेको छ।
थप जानकारी वा परीक्षण यात्राका लागि नजिकको टिभिएस विक्रेतामा सम्पर्क गर्न सकिने जनाइएको छ।
