पोखरा । पोखराको छोरेपाटन माध्यमिक विद्यालयका अध्यक्ष बद्रीनाथ पहारीमाथि कालोमोसो दलेको अभियोगमा हालसम्म ३ जना पक्राउ परेका छन् ।
जिल्ला प्रहरी कार्यालय कास्कीका अनुसार सो घटनामा संलग्न रहेको अभियोगमा घटना भएकै दिन असार २७ गते ३५ वर्षीय सुजन आयाम भन्ने लोकेन्द्र विश्वकर्मा पक्राउ परेका थिए । नेपाल कम्युनिष्ट पार्टी बहुमतका ब्यूरो केन्द्रीय सदस्यसमेत रहेका ३५ वर्षीय आयामको स्थायी ठेगाना बझाङ भए पनि हाल पोखराको औद्योगिक क्षेत्र बस्दै आएको बताइएको छ ।
यस्तै, प्रहरीले अछाम जिल्ला बानियागढी गाउँपालिका ५ घर भइ हाल पोखरा–१४, औद्योगिक क्षेत्र बस्ने २६ वर्षीय राजन सायद र बाजुरा जिल्ला स्वार्मीकार्तिक खापर गाउँपालिका २ घर भइ हाल पोखरा–५, पस्र्याङ बस्ने १८ वर्षीय बासुदेव बुढालाई पनि नियन्त्रणमा लिएको जनाएको छ । तीमध्ये साजन नेपाल क्रान्तिकारी विद्यार्थी संघ गण्डकीका संयोजक हुन् भने अर्का बासुदेव नेपाल क्रान्तिकारी विद्यार्थी संघ कास्की संयोजक हुन् ।
उनीहरु दुवैजना भौतिक रुपमा उपस्थित भई कालोमोसो दल्ने कार्यमा संलग्न रहेको प्रहरीको प्रारम्भिक अनुसन्धानमा जनाइएको छ । पक्राउ परेकालाई जिल्ला प्रशासन कार्यालय कास्कीबाट सार्वजनिक हित, स्वास्थ्य, सुरक्षा, सुविधा र नैतिकताविरुद्ध कसूरअन्तर्गत अभद्र व्यवहार गर्न नहुने मुद्दामा १० दिन म्याद थप गरी अनुसन्धान प्रक्रिया अघि बढाइएको कास्की प्रहरीले जनाएको छ । साथै, उनीहरुलाई मुलुकी अपराध संहिता, २०७४ को परिच्छेद २१ को दफा २५३ आपराधिक लाभ (एक्सटर्सन) लिन नहुने कसूरमा समेत जिल्ला अदालतबाट पक्राउ अनुमति लिई अनुसन्धान थालिएको छ ।